මෙම වසරේ දෙවන කාර්තුවට අදාළව ජනලේඛන හා සංඛ්යාලේඛන දෙපාර්තමේන්තුව නිකුත්කළ නවතම දත්ත වාර්තාව අනුව මෙරට ධීවර අංශය, එළවළු බෝග වගාව සහ රබර් වගාකිරීම අස්ථාවර මාවතක ගමන් කරන බව අනාවරණය වනවා.
2025 වසරේ දෙවන කාර්තුව වන අප්රේල් 01 සිට ජුනි 30 දක්වා වූ කාලසීමාවට අදාළව සිදුකර ඇති මෙම කාර්තුවේ කෘෂිකාර්මික, කර්මාන්ත හා සේවා ආර්ථික කටයුතුවල ධන අගයක් වාර්තා කර ඇතැයි සඳහන්.
අදාළ ජාතික ගිණුම් ඇස්තමේන්තු දත්ත අනුව එළවළු වගාව 3.6%ක සෘණ අගයක්ද, කරදිය මත්ස්ය නිෂ්පාදනය 5.2%ක සෘණ වර්ධනයක් ද, මිරිදිය මත්ස්ය නිෂ්පාදනය 34.8%ක දැවැන්ත සෘණ අගයක් ද රබර් වගා කිරීම 10.8%ක සෘණ අගයක්ද වාර්තා කර තිබෙනවා.
රබර් සංවර්ධන දෙපාර්තමේන්තුවට අනුව දෙවන කාර්තුවේ නිෂ්පාදන පහත වැටීමට හේතු වී ඇත්තේ මාර්තු – අප්රේල් කාලය රබර් වගාවේ දළු දමන කාලය වීම සහ මැයි – ජූනි කාලයේ ඇදහැලුණු අධික වර්ෂාවයි.
මෙම ගණනය කිරීම අනුව මෙම කාර්තුවේ කෘෂිකාර්මික ආර්ථික කටයුතු 2%කින්, කර්මාන්ත ආර්ථික කටයුතු 5.8%කින්, සේවා ආර්ථික කටයුතු 3.9%කින් ලෙස ධන අගයන් වාර්තා කර තිබෙනවා.
නිෂ්පාදන ප්රවේශය යටතේ එළිදක්වා ඇති දත්ත අනුව වී, ධාන්ය, උක්, පළතුරු, කුළුබඩු වගාකිරීම ආදී ක්ෂේත්ර සැලකිය යුතු අයුරින් ධන වර්ධනයක් පෙන්නුම් කර තිබෙනවා.
ශ්රී ලංකාවට විදේශ විනිමය ලබාදෙන ප්රධානම මූලාශ්රයක් වන තේ වගා කිරීම ද දෙවන කාර්තුවේදී 6%ක වර්ධනයක් වාර්තා කර තිබෙනවා.
මස් පිණිස සතුන් ඇති කිරීම, ‘කිරි නිෂ්පාදනය සහ බිත්තර නිෂ්පාදනය’ යන උප කාණ්ඩ කිහිපයකින් සමන්විත සත්ව නිෂ්පාදනය මෙම වසරේ දී දෙවන කාර්තුවේදී කැපීපෙපන වර්ධනයක් පෙන්නුම් කර ඇති අතර එය 2024 දෙවන කාර්තුවට සාපේක්ෂව 13.9%ක සැලකිය යුතු වර්ධනයක්.
