පසුගිය මැයි 11 වැනි දින කොත්මලේ ගැරඬි ඇල්ල ප්‍රදේශයේදී සිදු වූ මාරක රිය අනතුර පිළිබඳ කමිටු වාර්තාව නිල වශයෙන් භාර දී තිබෙනවා.
ජ්‍යෙෂ්ඨ නියෝජ්‍ය පොලිස්පති අජිත් රෝහණ විසින් මහජන ආරක්ෂක සහ පාර්ලිමේන්තු කටයුතු අමාත්‍යවරයා වෙත වාර්තාව ඉදිරිපත් කර ඇති බව සඳහන්.
මාධ්‍ය හමුවකට එක්වෙමින් ජ්‍යෙෂ්ඨ නියෝජ්‍ය පොලිස්පති අජිත් රෝහණ පැවසුවේ බස් රථය අනතුරට පත්වන විට රියදුරු සහ කොන්දොස්තරවරයා සමඟ මගීන් 84 දෙනෙකු එහි සිටි බව විමර්ශනයෙන් හෙළි වූ බවයි.
කොත්මලේ අනතුරෙන් පුද්ගලයන් 22 දෙනෙකු ජීවිතක්ෂයට පත් වූ අතර තවත් බොහෝ දෙනෙකු තුවාල ලැබුවා.
“බස් රථය කතරගම ඩිපෝවෙන් රාත්‍රී 10ට පිටත් වෙලා තිබෙනවා, ගමන් කාලය ආසන්න වශයෙන් පැය 9.5ක්. රියදුරු සහ කොන්දොස්තර යන දෙදෙනාම සවස 6ට රාජකාරියට වාර්තා කර තිබෙනවා, එහි ප්‍රතිඵලයක් ලෙස මුළු රාජකාරි කාලය පැය 13.5ක් පමණ වෙලා,” ජ්‍යෙෂ්ඨ නියෝජ්‍ය පොලිස්පති අජිත් රෝහණ පැවසුවා.
ඒ වන විට මීදුම, වැසි හෝ ලිස්සන සුළු මාර්ග වැනි අහිතකර කාලගුණික තත්ත්වයන් නොතිබූ බවත්, ඉදිරියෙන් වාහන ධාවනය නොවූ බවත් පරීක්ෂණවලින් තහවුරු වූ බවත් ඔහු පැහැදිලි කළා.
විශේෂඥයන් සහ රජයේ රස පරීක්ෂකවරයාගේ තක්සේරු කිරීම්වලින් වාහනයේ කිසිදු යාන්ත්‍රික දෝෂයක් හෝ පෙර අනතුරු සිදුවී නොමැති බව ද ජ්‍යෙෂ්ඨ නියෝජ්‍ය පොලිස්පතිවරයා සඳහන් කළා.
ඔහු වැඩිදුරටත් පැවසුවේ “පශ්චාත් මරණ පරීක්ෂණ වාර්තාවෙන් තහවුරු වූයේ රියදුරුට හෘදයාබාධයක් වැනි ශාරීරික රෝගයක් තිබී නොමැති බවයි. ඊට අමතරව, සිද්ධිය වන අවස්ථාවේ රියදුරු මත්පැන් හෝ මත්ද්‍රව්‍යවල බලපෑමෙන් නොසිටි බව ද වාර්තාවලින් පෙනී ගියා.”
ඒ අනුව රියදුරා වෙහෙසට පත්ව රිය පැදවීමේදී නින්ද යෑම අනතුරට හේතුවන්නට ඇති බවයි පැවසෙන්නේ.
