ගාසා තීරයේ පලස්තීනුවන්ට එරෙහිව ඊශ්‍රායලය ජන සංහාරයක් සිදුකර ඇති බව එක්සත් ජාතීන්ගේ විමර්ශන කොමිසම පවසනවා.
ජාත්‍යන්තර නීතිය යටතේ අර්ථ දක්වා ඇති ජන සංහාරක ක්‍රියාවන් පහෙන් හතරක් 2023 දී හමාස් සමඟ යුද්ධය ආරම්භ වූ දා සිට ඊශ්‍රායලය සිදුකර ඇති බවට නිගමනය කිරීමට සාධාරණ හේතු ඇති බවයි නව වාර්තාවක සඳහන් වන්නේ.
කණ්ඩායමක සාමාජිකයින් ඝාතනය කිරීම, ඔවුන්ට බරපතළ ශාරීරික හා මානසික හානියක් සිදු කිරීම, කණ්ඩායම විනාශ කිරීමට සැලසුම් කළ කොන්දේසි හිතාමතාම ඇති කිරීම සහ දරු උපත් වැළැක්වීම ඒ අතර වේ.
ඊශ්‍රායල නායකයින්ගේ ප්‍රකාශ සහ ඊශ්‍රායල හමුදාවල හැසිරීම් රටාව, ජන සංහාරක අභිප්‍රාය පිළිබඳ සාක්ෂි ලෙස අදාළ වාර්තාවේ උපුටා දක්වනවා.
ඊශ්‍රායල විදේශ අමාත්‍යාංශය පැවසුවේ එම වාර්තාව “විකෘති හා අසත්‍ය” ලෙස හෙළා දකිමින් එය තරයේ ප්‍රතික්ෂේප කරන බවයි.
