මෙරට අලි මරණ සංඛ්‍යාවේ භයානක වැඩිවීම පිළිබඳ ‘දැඩි කණස්සල්ල’ පළ කරමින් ශ්‍රී ලංකා නීතිඥ සංගමය (BASL) ජනාධිපති අනුර කුමාර දිසානායක වෙත ලිපියක් යොමුකර .තිබෙනවා
එම ලිපියෙන් ඔවුන් පෙන්වා දී ඇත්තේ මෙරට අලි මරණ ප්‍රමාණය ලෝකයේ ඉහළම අගය බවයි.
දිවියන් සහ අනෙකුත් ආරක්ෂිත සතුන් අඛණ්ඩව ඝාතනය කිරීම පිළිබඳව ද ශ්‍රී ලංකා නීතිඥ සංගමය මෙම ලිපියෙන් අවධානය යොමු කර තිබෙනවා.
ශ්‍රී ලංකාවේ වනජීවීන් රටේ උරුමයට සහ ආර්ථිකයට, විශේෂයෙන් සංචාරක ව්‍යාපාරයට අත්‍යවශ්‍ය බව එම සංගමය අවධාරණය කරනවා.
පවතින නීති රාමුවේ හදිසි සංශෝධනයක් සිදු කරන ලෙස ශ්‍රී ලංකා නීතිඥ සංගමය ලිපියෙන් ඉල්ලා සිටි අතර එවැනි නීති ප්‍රතිසංස්කරණ සඳහා සිය යෝජනා ඉදිරිපත් කරන බව ද නිවේදනය කරනවා.
මේ අතර, දඩ මුදල් සහ දඬුවම් වැඩි කිරීම සඳහා වන සත්ත්ව හා වෘක්ෂලතා ආරක්ෂණ ආඥා පනතට කෙටි කාලීන සංශෝධන ක්‍රියාත්මක කරන ලෙස ශ්‍රී ලංකා නීතිඥ සංගමය රජයෙන් ඉල්ලා සිටිනවා.
එය ආරක්ෂිත සත්ව විශේෂ නීති විරෝධී ලෙස ඝාතනය කිරීම සඳහා ක්ෂණික වැළැක්වීමක් ලෙස ක්‍රියා කරනු ඇති බව එම සංගමයේ මතයයි.
