ධීවර කටයුතු සඳහා පිටත්ව ගිය ධීවර යාත්‍රා දෙකක් අනතුරට පත්ව තිබෙනවා.
මෙලෙස අනතුරට පත්ව ඇත්තේ දෙවුන්දර ධීවර වරායෙන් පිටත්වූ යාත්‍රාවක් සහ කළුතර ප්‍රදේශයෙන් මුහුදු ගිය ධීවර යාත්‍රාවක්.
දෙවුන්දර ධීවර වරායෙන් ඊයේ (27) සවස පිටත්ව ගිය යාත්‍රාවේ ධීවර කාර්මිකයින් 5 දෙනෙකු සිට ඇති බවට විශ්වාස කරනු ලබන අතර එම යාත්‍රාව වාණිජ නෞකාවක ගැටී මෙම අනතුර සිදුව ඇති බවටයි සැක කෙරෙන්නේ.
කෙසේ නමුත් අනතුරින් එක් ධීවරයෙකු මුදවාගෙන ගොඩබිමට රැගෙන විත් ඇති අතර අනෙකුත් ධීවරයින් සිව්දෙනා අතුරුදන්ව ඇතැයි සඳහන්.
සිද්ධිය සම්බන්ධව නාවික හමුදාවට දැනුම් දීමෙන් අනතුරුව නාවික හමුදාව විසින් සෝදිසි මෙහෙයුම් යාත්‍රාවක් පිටත් කර යවා ඇති අතර වෙනත් ධීවර යාත්‍රා කිහිපයක්ද මේ වන විටත් අතුරුදන් වූ එම ධීවරයින් සිව්දෙනා සෙවීමේ කටයුතු ආරම්භ කර තිනබෙනවා.
ගොඩබිම සිට සැතපුම් 7 කට ආසන්න මුහුදේ මෙම අනතුර සිදුව ඇති බවයි වාර්තා වන්නේ.
මේ අතර කළුතර බේරුවල මොරගල්ල ප්‍රදේශයේදී ධීවර කටයුතු සදහා මුහුදු ගිය ධීවර යාත්‍රාවක් පෙරලී එහි ගමන්ගත් ධීවරයින් දෙදෙනකු අතුරුදන්ව ඇති බව පොලිසිය පවසනවා.
මෙසේ අතුරුදන්ව ඇත්තේ ධනුෂා මැරීන් දරන කුඩා ධීවර බොටුටුවේ ගමන්කල අළුත්ගම ප්‍රදේශයේ පදිංචිව සිටී එකම පවුලේ සහෝදරයින් දෙදෙනෙකු බව වාර්තා වෙනවා.
අතුරුදන් පුද්ගලයින් අවට පිරිස් විසින් බෝට්ටු යොදාගනිමින් සොයමින් සිටීන අතර, අනතුරට පත් බෝට්ටුව වෙරළට රැගෙන විත් ඇති බව ද සඳහන්.
මේ අතර අතුරුදහන් වූ ධීවරයින් 6 දෙනා සෙවීම සඳහා ශ්‍රී ලංකා ගුවන් හමුදාව බෙල් 412 හෙලිකොප්ටර් යානය සහ Y-12 ගුවන් යානයක් ද යොදවා තිබෙනවා.
ඒ ආරක්ෂක අමාත්‍යාංශයේ ලේකම්වරයාගේ නියෝගය මතයි .
ඒ අනුව, විශේෂ සෝදිසි කිරීමේ සහ මුදා ගැනීමේ මෙහෙයුමක් ක්‍රියාත්මක වෙමින් පවතිනවා.
