සිංහල රිදී තිරයේ නිළි රැජින මාලනී ෆොන්සේකා මහත්මියගේ දේහය පිළිබඳ අවසන් කටයුතු අද (26) පස්වරුවේ කොළඹ නිදහස් චතුරස්‍ර පරිශ්‍රයේදී පූර්ණ රාජ්‍ය අනුග්‍රහය සහිතව සිදුකෙරුණි.
78 හැවිරිදි වියේදී ඇය පසුගිය සෙනසුරාදා දිවි රග මඩලට සමුදුන්නේ කොළඹ පිහිටි පෞද්ගලික රෝහලක ප්‍රතිකාර ලබමින් සිටියදීය.
දශක 06 කට ආසන්න කාලයක් සිය රංග ප්‍රතිභාවෙන් රිදී තිරයත් පුංචි තිරයත් ෙව්දිකාවත් ඒක ලෙස ඒකාලෝක කළ මාලිනියන් මෙරට සිනමාව ජාත්‍යන්තර තලයට රැගෙන යාමටද සමත් වූවාය.
මාලනී ෆොන්සේකා මහත්මියගේ දේහය අද පෙරවරුවේ අවසන් ගෞරව දැක්වීම සඳහා කොළඹ නිදහස් චතුරස්‍ර පරිශ්‍රයට රැගෙන ආ අතර අද පස්වරු 3.30 දක්වා මහජන ගෞරව සඳහා දේහය නිදහස් චතුරස්‍ර පරිශයේ තැන්පත් කරනු ලැබීය.
පසුව පස්වරු 03.30ට ඇය අධ්‍යාපනය ලැබු කැලණිය ගුරුකුල විද්‍යාලයේ ආදි ශිෂ්‍ය ශිෂ්‍යාවන් සහ කලාකරුවන් විසින් දේහය බෞද්ධ ආගමික වතාවත් සිදුකිරීම සඳහා ඉදිකළ විශේෂ වේදිකාව වෙත රැගෙන ආ අතර එහිදි මහා සංඝරත්නය විසින් ආගමික වතාවත් සිදුකරනු ලැබීය.
පසුව පස්වරු 5.45ට පමණ දේහය චිතකය වෙත රැගෙන යාම සිදු කෙරුණු අතර එහිදී ඉන්ද්‍රචාපා ලියනගේ සහ ආනන්ද ගමගේ විසින් චිතකය වෙත ගිනි දැල්වීය.
හෙළයේ නිළි රැජිණ මාලනී ෆොන්සේකා මහත්මිය සුවහසක් රසික රසිකාවියන්ගේ සෝ සුසුම් මැද ඒ ලෙස දැයෙන් සමුගත්තාය. ඒ ඇගේ රුවත් රංග ප්‍රතිභාවත් රසික සිත් මත සදාකාලිකව ම තැන්පත් කරමිනි.
