ශ්‍රී පාද වන්දනා සමය අද (12) දිනයෙන් නිමාවට පත් වේ.
ඒ අනුව හෙට දින දහවල් ශ්‍රී පාදස්ථානාධිපති, බෙංගමුවේ ශ්‍රී ධම්මදින්න නායක හිමියන්ගේ අනුශාසනා මත ශ්‍රී පාද උඩ මළුවේදී සධාතුක කරඬුවට හා ශ්‍රී සුමන සමන් දෙවියන්ගේ රන් මුවා පිළිමයට බෞද්ධ වත් පිළිවෙත් අනුව වන්දනාවාරය නිමා කිරීමට ප්‍රථම චාරිත්‍රාණුකූල පුද පූජා පැවැත්වීම සිදු කෙරේ.
ඉන් අනතුරුව සධාතුක කරඬුව, සමන්දේව රුව හා දේවාභරණ රැගත් විශේෂ පෙරහැර පැල්මඩුල්ල ගල්පොත්තාවෙල ශ්‍රී පාද රජමහා විහාරය දක්වා වැඩම කිරීම සඳහා ශ්‍රී පාදස්ථානයේ සිට නල්ලතන්නිය ශ්‍රී පාද ධර්ම මධ්‍යස්ථානය වෙත හෙට පස්වරුවේ ගමන් ආරම්භ කරනු ලබයි.
ශ්‍රී පාද ධර්ම මධ්‍යස්ථානයේ සිට විශේෂ රියක තැන්පත් කරන සධාතුක කරඬුව, සමන් දේව පිළිමය හා දේවාභරණ එක් පෙරහැරක් මාවුස්සාකැලේ, ලක්ෂපාන, කළුගල, අවිස්සාවේල්ල මාර්ගයෙන් හා අනෙක් පෙරහැර මස් කෙළිය, නෝර්වුඩ්, බගවන්තලාව, බලංගොඩ මාර්ගයෙන් පැල්මඩුල්ල ගල්පොත්තාවෙල ශ්‍රී පාද රජ මහා විහාරය දක්වා වැඩම කෙරෙනු ලබයි.
මෙම පෙරහැරවල් දෙකට සමගාමීව පෙර වසරවලදී මෙන්ම මෙවරද ශ්‍රී පාද උඩමළුවේ සිට එරත්න – රත්නපුර මාර්ගයෙන්ද සමන්දේව රුව හා දේවාභරණ රැගත් විශේෂ පෙරහැරක් ගල්පොත්තාවෙල ශ්‍රී පාද රජමහා විහාරය දක්වා වැඩම කිරීම සිදු කරනු ලබයි.
ශ්‍රී පාද වන්දනා සමය නිමා කිරීමෙන් අනතුරුව සධාතුක කරඬුව, ඓතිහාසික ශ්‍රී සුමන සමන්දෙවියන්ගේ රන්මුව පිළිමය හා දේවාභරණ ශ්‍රී පාද අවාර සමයේ පැල්මඩුල්ල ගල්පොත්තාවෙල ශ්‍රී පාද රජ මහා විහාරයේ සමන්දේවාලයේ තැන්පත් කෙරේ.
