මෙවර පළාත් පාලන ආයතන ඡන්දයෙන් කොළඹ මහ නගර සභාවට තරගකර තේරී පත්වූ ස්වාධීන කණ්ඩායම් මෙන්ම කුඩා කණ්ඩායම්වල සභිකයින් සහ ජනාධිපති අනුර කුමාර දිසානායක මහතා අතර සාකච්ඡාවක් පවත්වා තිබේ.
ඊයේ (19) පස්වරුවේ එම සාකච්ඡාව පැවැති බව වාර්තා වෙයි.
ජාතික ජන බලවේගයේ පැලවත්ත පක්ෂ මූලස්ථානයේදී මෙම සාකච්ඡාව පවත්වා තිබේ.
ඒ අනුව, කුඩා පක්ෂ හා ස්වාධීන කණ්ඩායම් නියෝජනය කරමින්, එම සාකච්ඡාව සඳහා 09 දෙනෙකු පමණ සහභාගී වී ඇති බවයි සඳහන් වෙන්නේ.
එහිදී පක්ෂ හා ස්වාධීන කණ්ඩායම් කිහිපයක සහයෝගය රජයට ලබාදෙන බවට ප්‍රකාශ කර ඇති බවයි ප්‍රජාතන්ත්‍රවාදී ජාතික සන්ධානයේ ජාතික සංවිධායකවරයා සඳහන් කළේ.
එම සාකච්ඡාවේදී සිය යෝජනා ජනාධිපතිවරයාට ඉදිරිපත් කළ බවත්, එහිදී ජනාධිපතිවරයාගෙන් යහපත් ප්‍රතිචාරයක් හිමිවූ බවත්, සභාව පිහිටුවීම සඳහා සිය සහයෝගය ලබාදෙන බවත් ඔහු වැඩිදුරටත් සඳහන් කළේය.
