අභාවප්‍රාප්ත හෙළ සිනමාවේ නිළි රැජිණ, මාලිනී ෆොන්සේකාගේ දේහය පිළිබදව අවසන් කටයුතු පූර්ණ රාජ්‍ය අනුග්‍රහය සහිතව අද (26) නිදහස් චතුරස්‍රයේදී සිදුකිරීමට නියමිතයි.
ඒ අනුව, දේහය ජාතික චිත්‍රපට සංස්ථාවේ සිට නිදහස් චතුරස්‍ර පරිශ්‍රය වෙත රැගෙනවිත් තිබේ.
ඇයගේ දේහය පිළිබද අවසන් කටයුතු පූර්ණ රාජ්‍ය අනුග්‍රහය සහිතව අද (26) පස්වරුවේ සිදුකිරීමට නියමිතයි.
උදෑසන 09 සිට පස්වරු 03 දක්වා අභාවප්‍රාප්ත මාලිනී ෆොන්සේකාගේ දේහයට අවසන් ගෞරව දැක්වීම සදහා මහජනතාවට අවස්ථාව සලසා දී තිබේ.
අනතුරුව පස්වරු 3.30 ට දේහය ආගමික වතාවත් සිදුකිරීම සඳහා නිදහස් චතුරස්‍රයේ ඉදිකළ විශේෂ වේදිකාව වෙත රැගෙන යාමට නියමිතයි.
අභාවප්‍රාප්ත මාලිනී ෆෝන්සේකාගේ අවසන් කටයුතු හේතුවෙන් නිදහස් චතුරස්‍රය අවට ප්‍රදේශයේ රථවාහන ගමනාගමනය සීමා කෙරෙන බව පොලිස් මාධ්‍ය කොට්ඨාසය සදහන් කළේය.
හෙළ සිනමාවේ නිළි රැජිණ ලෙස කිරුළු පළන් මාලිනී ෆොන්සේකා කොළඹ පෞද්ගලික රෝහලක ප්‍රතිකාර ලබමින් සිටියදී සිය දිවි සැරියට සමුදුන්නාය.
කලක් රෝගාතුරව සිටි ඇය මිය යනවිට 78 වැනි වියේ පසුවිය.
ඇයගේ දේහය මාදිවෙල පිහිටි නිවස වෙත රැගෙන ඒමෙන් පසු ඇගේ ඥාතීන්, සමකාලීනයන් ඇතුළු ක්ෂේත්‍රයේ බොහෝ දෙනෙකු අවසන් ගෞරව දැක්වූහ.
අනතුරුව ඇයගේ දේහය ඊයේ රිය පෙරහරකින් ජාතික චිත්‍රපට සංස්ථාවේ තරංගනී ශාලාව වෙත රැගෙන එනු ලැබීය.
මාලනී ෆොන්සේකාගේ දේහයට අවසන් ගෞරව දැක්වීම සදහා ජනාධිපති අනුර කුමාර දිසානායක ඇතුලු දේශපාලඥයන් රැසක් ඊයේ එක්ව සිටියහ.
